 Miss You Daadi
--------------------------------------------------------------------------------
Patthar se cheer faad kar,
Imli ke do beejon ko chaar kar,
baraamde par oon teenon ke saath,
Eent se khaane banaakar,
Masti me hokar magan,
Khelaa karte the kabhi hum,
Ang-bang-chauk-chang...
Jaane kab woh achaanak chupke se daud kar aa jaati thi...
aur woh teenon, dum dabaa kar sarpat ho jaate the...
kahin aise bhaag jaate the jaise,
chaar chor me se ek pakada gaya ho,
Aur baaki door chhup kar khade dekh rahe hon,
Darr ke maare sir se paon tak thithoor rahe hon...
Ooske haath ki ungaliyan,
mere kalaiyon se jyaada badi nahi thi,
par fir itni chhoti bhi nahi,
ki mere kaan pakad kar fatkaar na sake...
Itni kamzor nahi,
ki mujhe faatak ke oos paar na kar sake...
Do halke tamaache,
aur kuchh kadak daante...
"barmaade uthne baithne ke liye hote hain,
Chang khelne ke liye nahi,
Ghar ki safaai,
raunak banaane ke liye hoti hai,
bhang karne ke liye nahi..."
Chup chaap sab sun kar,
Muh fulaaye, daaton me hoth bhiche..
Ghanto khadaa rahtaa,
Main kisi diwar ke piche...
Aur woh bulaaya karti fir,
kabhie chhote-mote kaam karvaane ke bahaane,
kuchh nahi to amrood khaane,
ya paido se tute aam choosne ke bahaane...
Aur main patthar ki murat, jald pighal jaata,
Woh hum sab ke rang me utar jaati,
Raat hote-hote main bhi,
sab kuchh bhool ooske aanchal me choop jaata...
Ab kabhie lautataa hoon to safed saari odhe,
woh meri taraf hasrat se dekhaa karti hai...
Main oos se chaar ungal aur ooncha ho chuka hoon,
Mere haath abhi bhi kamzor hain,
Par itne durbal nahi ki,
gale lagaane ke saath-saath oose uthaa na sakun...
Ek pal ko oose aasman mai ghooma na sakun...
Kal fir phone ki ghanti baje hi jaa rahi thi,
Main apne,
Naye makaan ki safaai ke baad,
kamre ki deewar me keel laga rahaa tha...
Sabse baat karne ki mujhe fursat na thi,
Woh bhi shaayad kahin kisi kone mai khadi thi,
Fir bhi dabi aawaz me oosne apne shabd pahuncha hi diye...
"Mhaari taraf se dher saara aasirvaad keh di jo chhora ko".
Labhz shaayad thode sai bheege hue the,
Aawaaz shaayad thodi si kamjor ho gayi thi¡*
Ek halki si aawaz jo vo shayad man mai kah rahi thi..
Ki kya pataa ab chokre ko dekh bhi paau yaa nahi¡*
Vo videsh mai bahut door rahne gaya hai¡*
Bahut mehnat kar raha hai¡*
-Miss you Daadi. | 
Linear Mode
